Flamuri shqiptar në Google, “Qytetar Nderi” iniciatorit Klajdi Hëna

KORCE - Flamuri shqiptar në logon e motorit më të madh të kërkimit, Google, surprizoi miliona shqiptarë. Sapo ora shënoi 00:00, iniciativa e të riut Klajdi Hëna nga Korça, emigrant në Miçigan, u bë realitet. Nëpërmjet një peticioni në faqen e internetit www.change.org, ai arriti të marrë firmat e 75 mijë shqiptarëve. Ata i kërkuan Google që të vendoste një Doodle (logot që vendos Google në faqen e saj), me flamurin shqiptar më 28 Nëntor, me rastin e 100-vjetorit të shpalljes së pavarësisë.

Nisma e të riut shqiptar që jeton në SHBA, Klajdi Hëna, është pranuar nga drejtuesit e kompanisë gjigante, faqja e së cilës klikohet nga më shumë se një miliard persona në ditë.

Pikërisht për këtë ngjarje që gazmoi miliona shqiptarë, komuna Libonik në Korçë ka propozuar ta shpallë “Qytetar nderi” Klajdi Hënën. Propozimi është bërë ditën e sotme, ndërsa pritet të marrë miratimin në mënyrë unanime nga të gjithë këshilltarët e komunës Libonik. Të gjithë klikuesit e Google në Shqipëri e Kosovë u ballafaquan me flamurin kuqezi dhe një numër 100, që simbolizon 100-vjetorin e pavarësisë së Shqipërisë. Në fakt, një ndryshim i tillë i faqes mund të shihej vetëm nga përdoruesit e IP-së shqiptare, dhe jo në shtetet e tjera.

Që kërkesa të merrej parasysh nga drejtuesit e Google, duhet të kishte të paktën 50 mijë veta. Por iniciativa e të riut korçar e tejkaloi këtë shifër. Google ka pasur kohët e fundit disa praktika të ndryshimit të logove, në të datave historike apo edhe evenimenteve të tjera. Logoja e flamurit shqiptar në faqen e Google pushtoi edhe profilet e miliona shqiptarëve.