Mitrovicë, granatë në shtëpinë e shqiptarit

Një granatë dore e pashpërthyer është gjetur të martën pasdite në ballkonin e shtëpisë së një shqiptari në veri të Mitrovicës.

Zëdhënësi i policisë për këtë rajon, Besim Hoti tha se mjeti shpërthyes është gjetur në ballkonin e një shtëpie të banuar në rrugën “Kolashini”, në veri të Mitrovicës.

“Ekspertët e KFOR-it, të cilët kanë bërë ekzaminimin e vendit të ngjarjes, kanë konfirmuar se mjeti shpërthyes është një granatë dore e tipit M-52”, ka thënë zëdhënësi.

Sipas tij, granata dyshohet se ishte hedhur nga persona të panjohur në vendin ku është gjetur dhe për arsye të panjohura nuk kishte shpërthyer.

Burimi shton më tej se, granata nuk mbante sigurecën dhe është eleminuar nga ekspertët e KFOR-it pas një shpërthimi të kontrolluar në vendin e ngjarjes.