ISHP: Në rritje numri i përdoruesve të drogës, në rrezik nxënësit e shkollave

Alarmante janë shifrat e publikuara nga Instituti i Shëndetit Publik lidhur me përdoruesit e drogave në kryeqytet.
Sipas ISHP-së, niveli i përdorimit të lëndëve narkotike rritet nga viti në vit. Të së njëjtit konkluzion janë edhe qendrat që trajtojnë përdoruesit e drogave, të cilat theksojnë se shumica prej tyre janë adoleshentë.
ISHP informon se rreth 7% e të rinjve përdorin droga nga më të lehtat, deri tek ato të rëndat apo me injeksione. Sipas këtyre të dhënave, kjo përqindje është në rritje dhe prek kryesisht nxënësit e shkollave të mesme, që janë më të ekspozuar ndaj lëndëve narkotike.
Qytetet më problematike janë qytetet e mëdha, si Tirana, Durrësi, Fieri apo Vlora. Trafikantët e drogës përqendrohen kryesisht pranë zonave urbane dhe droga të formave të ndryshme qarkullojnë edhe pranë mjediseve shkollore.
Për parandalimin e këtij fenomeni në rritje, specialistët pranë ISHP-së shprehen se duhen marrë masa efikase, nëpërmjet programeve enkas për këtë problem. Pasojat e përdorimit të drogave (të cilat do forme) janë shumë të rënda për shëndetin dhe jetën sociale të përdoruesve. /alb-observer.com/