“Ethnos”: Shqipëria kthen faqe, Athina investoi te Berisha

“Të dhëna të reja mbi marrëdhëniet greko-shqiptare krijon fitorja e gjerë elektorale e Partisë Socialiste të Edi Ramës, ku ilustrohen gjithashtu edhe problemet serioze me të cilat ballafaqohet minoriteti grek, në përpjekjet e tij për vazhdimësinë e përfaqësimit politik”, kështu shkruan sot gazeta greke “Ethnos”.

“Kryesocialisti shqiptar Edi Rama edhe pse ruajti një marrëdhënie rudimentare me PASOK-un grek si një parti “motër", i kishte praktikisht “zero” marrëdhëniet politike me Athinën, e cila në vitet e fundit investoi tek "përvoja dhe besueshmëria" e Sali Berishës”, vijon gazetari në shkrim.

Ai vëren se një pikë kthese në marrëdhëniet e zotit Rama me Greqinë ishte iniciativa në Gjykatën e Lartë Kushtetuese, për marrëveshjen greko-shqiptare mbi delimitimin e zonave detare, duke e anuluar përfundimisht atë, gjë që çoi në "ngrirjen" e marrëdhënieve mes dy vendeve.

Gazeta thekson se Rama sigurisht ka vënë një prioritet të lartë të qeverisë së tij kapërcimin e problemeve lidhur me demokracinë dhe sundimin e ligjit në trajtimin e korrupsionit dhe krimit të thellë, në mënyrë që të hapë rrugën për perspektivën Europiane të Shqipërisë.

Duke kaluar te partia e pakicave greke, PBDNJ, “Ethnos” shkruan: “Në bashkëpunim me Partinë Socialiste u shfaq në zgjedhje PBDNJ, pika fokale e minoritetit grek”.

Sipas gazetës, PBDNJ në zgjedhjet e mëparshme bashkëpunoi me Partinë Demokratike, një "martesë" që u shpërbë pas deklaratave nacionaliste dhe irredentiste të bëra nga z. Berisha mbi "Shqipërinë e Madhe" dhe pas bashkëpunimit të tij me partitë ekstreme të çamëve. “E ballafaquar me vështirësi shumë të mëdha, PBDNJ arriti të mbijetojë politikisht dhe sipas shifrave paraprake, kreu i saj Vangjel Dule arrin të zgjidhet në Vlorë dhe Andrea Martos në Tiranë në fletën e votimit të Partisë Socialiste. Me Partinë Socialiste dhe Partinë e Ilir Metës në Gjirokastër dalin dy deputetë të pakicës, respektivisht Anastas Angjeli dhe Vangjel Tavo”, përfundon shkrimi i “Ethnos”.
Ballkanweb

Po ku tjeter do investonte Athina dhe Beogradi mo, te miku i tyre i shtrenjte...