Historiani bullgar: Ali Ahmeti për kryeministër

Drejtori i Muzeut Historik të Bullgarisë, i cili me decenie të tëra është në konflikt me politikën nacionale, për mediat bullgare deklaroi se Ali Ahmeti është politikani më i pjekur i Maqedonisë dhe se meriton të bëhet kryeministër.

Duke komentuar qëndrimet e djeshme të Ahmetit lidhur me problemin që ka me Greqinë për emrin dhe marrëdhëniet me Bullgarinë, historiani Dimitrov (në foto) tha: “Ashtu si Arben Xhaferi, nga viti 1996 e deri në vdekjen e tij, dëshmoi se është politikani më i përgatitur dhe më tolerant, ashtu edhe Ali Ahmeti dëshmoi se është politikani i Maqedonisë më i përgatitur, më i hapur dhe më evropian”.

Sipas Dimitrovit, transmeton Alsat-M, Ali Ahmeti dëshmoi se marrëdhëniet e vendit me fqinjët mund të merrnin kahe tjetër nëse ai do të ishte kryeministër i Republikës së Maqedonisë. Në atë rast, shtoi Dimitrov, marrëdhëniet me Greqinë dhe Bullgarinë, por edhe me Shqipërinë dhe Kosovën do të ishin shumë më të mira.