Krijohet ora më e saktë në botë

Fizikanët amerikanë njoftuan dje krijimin e një ore atomike eksperimentale, e cila pritet të jetë më e sakta në botë, që mund të ketë luhatje prej të paktën një sekonde në 13.8 miliardë vjet, aq sa është edhe mosha e universit.

“Kjo orë funksionon me atomet e iterbiumit, një element i rrallë në tokë dhe me laser, që mundësojnë rregullsinë e lëvizjes së akrepave dhjetë herë më saktë se orët atomike ekzistuese”, theksuan fizikanët.

“Ky zbulim i madh në fizikë paraqet jo vetëm saktësinë e matjes së kohës universale, por edhe GPS-in si dhe një sërë sensorësh të forcave të ndryshme të tilla, si graviteti, fusha magnetike dhe temperatura”, deklaroi Andrew Ludlow, një fizikant i National Institute of Standard and Technology (NIST), si dhe një nga bashkautorët kryesorë të revistës amerikane “Science”.

“Ky është një hap i rëndësishëm në evoluimin e orëve atomike të gjeneratës së ardhshme aktualisht në zhvillim”, u shpreh ai.

BW transmeton se sikundër të gjitha orët, ato atomike matin kohën duke u bazuar në kohëzgjatjen e një sekonde, që korrespondon me një fenomen fizik, që ndodh rregullisht.

Ndërsa orët mekanike përdorin lëvizjen e lavjerrësit për të llogaritur kohën, orët atomike janë të bazuara në frekuencë gjithnjë konstante të dritës për emetimin e një atomi ceziumi.

Fjala e fundit e teknologjisë së orëve atomike bazohet në 10 000 atome iterbium të kaluara në procesin e ftohjes mbi zeron absolute (- 273,15 gradë Celsius). Këto atome janë bllokuar në puse të krijuara me rreze laser.

/Shekulli Online/Përgatiti: E.D/