Lejeqëndrimi për emigrantët, Greqia do lehtësojë kushtet

Qeveria greke ka gati një draft të ri ligjor për emigracionin, me anë të të cilit synon të lehtësojë kushtet që duhet të plotësojnë emigrantët, për të siguruar lejen e qëndrimit të tyre në Greqi.

Drafti që ka 20 ligje 6 dekrete presidenciale dhe 42 amendamente, që do të paraqiten në parlament për miratim brenda ditëve të para të shtatorit.

Autorët e ligjit e cilësojnë atë një ligj “revolucionar”, sepse sipas tyre do të përbëjë një ndihmë për emigrantët e huaj të "bllokuar" në krizën greke, ku nuk ka asnjë mundësi punësimi.

Pika më e rëndësishme është ajo që e heq varësinë e lejes së qëndrimit nga numri i ditëve të punës të siguruara. Ligji aktual kërkon nga 150-200 ditë pune të siguruara për të rinovuar lejen e qëndrimit, ndërsa drafti i ri nuk parashikon një kusht të tillë. Me ligjin e ri, për të rinovuar lejen e qëndrimit mjafton një librezë shëndetësore.

Ndryshimi tjetër është heqja e dispozitës që kushtëzonte bashkimin familjar, me vlerën e përgjithshme të të ardhurave vjetore, të cilat nuk mund të ishin më pak se 10 200 euro.

Drafti parashikon që poseduesit e lejes 10 vjeçare, të përfitojnë automatikisht statusin e rezidentit afatgjatë.

Edhe fëmijët që kanë lindur apo janë shkolluar në Greqi marrin statusin e rezidentit afatgjatë.

Hartuesit e draftit thonë se marrja e statusit të rezidentit afatgjatë u jep mundësinë emigrantëve që të shkojnë të punojnë në vende të tjera të Bashkimit Europian.

(Balkanweb)