Një adoleshent shqiptar pjesë e partisë neonaziste greke

Një fakt tjetër tronditës ka dale në dritë nga mediat greke në lidhje me dosjen voluminoze në ngarkim të “Agimit të Artë”, mbi veprimtaritë kriminale të kësaj partie. Shqetësues ka qenë fakti se një adoleshent shqiptar ishte i përfshirë në radhët e partisë neonaziste greke.

I riu shqiptar rekrutonte dhe mobilizonte të rinjtë e moshës 14-17 vjeç, të cilët më pas do të brumoseshin me idetë naziste dhe do të luftonin për to.

17-vjeçari, është shqiptari i tretë, që del në skenë, si i inkuadruar në radhët e neonazistëve, pas Roberto Haidit, shoqërues i deputetit Kostas Barbarusi dhe kryetares së forumit të ‘Gruas së Agimit të Artë’, Nikol Beneki. Sipas gazetës "Ethnos", shqiptarja në fjalë është shumë e afërt me një nga deputetët e arrestuar, Jorgos Lagos.

Ndërkaq sot rreth orës 13:10 është dorëzuar në Drejtorinë e Përgjithshme të Policisë së Athinës kryetari i grupit Parlamentar të partisë Agimi i Artë, Kristos Papas.

Me dorëzimin e tij, shkon në 6 numri i deputetëve të Agimit të Artë, që ndodhen në duart e drejtësisë, me akuzën për krijim të organizatës kriminale, vrasje, pastrim parash e korrupsion. Sipas informacioneve, asnjëri prej tyre nuk ka bashkëpunuar me policinë dhe nuk është përgjigjur për pyetjet e bëra. Në kërkim janë edhe 11 persona të tjerë.

/Shekulli Online/ E.L/