Pakistani lobon për Kosovën

Senatori Mushaid Hussain Sayed, i cili drejton komisionin e sigurisë kombëtare në Senatin e Pakistanit, ndodhet për një vizitë disaditore në Tiranë. Në një intervistë për Top-Channel, ai shpjegon se çfarë synon të arrijë nëpërmjet takimeve me zyrtarët më të lartë në Shqipëri.

“Jam këtu në këtë vizitë për të forcuar marrëdhëniet mes Pakistanit dhe Parlamentit shqiptar, në sferat politike, ato të sigurisë në kontekstin parlamentar. Marrëdhëniet mes dy vendeve tona janë shumë të mira. Ne kemi kërkuar krijimin e një grupi parlamentar miqësie Shqipëri-Pakistan, pasi ndajmë një demokraci dinamike. Një tjetër aspekt që ne dëshirojmë ta çojmë më përpara është ai politik. Shqipëria është i vetmi vend në Evropë anëtar i Konferencës Islamike”, ka deklaruar Sayed, duke shtuar se Shqipëria ka një rol politik të gjerë edhe jashtë Evropës.

Pakistani ishte ndër vendet e para që njohu pavarësinë e Kosovës. Senatori Sayed thotë se vendi i tij do të vijojë së lobuari në Konferencën Islamike në mënyrë që ato vende anëtare që nuk e kanë njohur ende pavarësinë e Kosovës të ndjekin shembullin e Pakistanit.

“Fatkeqësisht ekzistojnë paqartësi rreth situatës, por me iniciativën e Pakistanit, që e ka njohur pavarësinë e Kosovës dhe është një lider i botës myslimane, ne shpresojmë se të tjera vende do të ndjekin shembullin tonë. Parlamenti i Pakistanit qëndron në krah të Kosovës dhe ndihma jonë nuk do të mungojë përsa i përket nxitjes së vendeve të tjera për ta njohur atë si shtete”, nënvizon Sayed.

Falemenderes Pakistan.. suksese..

Pakistani lobon per te johur Kosoven por ky shtet esht Musliman dhe ata si ne shpirte jan kunder ISLAMIT qka do te filozofojn per ket