Shqiptari fle në trenat e Londrës për të shpëtuar të bijën

• Ali Haliti ka shkuar në Britani, pasi shteti i Kosovës nuk i ka ofruar ndihmë. Vajza e tij vuan nga epilepsia

Ky është një rrëfim tronditës për Ali Halitin nga Skënderaj, i cili fle nëpër trenat e Londrës. Aliu ka shkuar në Angli, pasi vajza e tij ka nevojë për trajtim jashtë vendit dhe shteti i Kosovës nuk ia ka mundësuar një gjë të tillë.

Ali Haliti nga fshati Poklek i Skënderajt ka shkuar në Londër prej tre muajsh. Atje, ai po kërkon punë dhe ndihmë për vajzën e tij që vuan nga epilepsia.

Shteti i Kosovës duket se nuk i ka ofruar ndihmë. Sipas bashkëatdhetarëve që e kanë takuar në Londër, Haliti punon gjatë natës në mënyrë të jashtëligjshme. Këtë ai po e bën për të siguruar para për shërimin e të bijës.

Sipas të dhënave nga Londra, Ali Haliti ka kërkuar nga Ambasada e Kosovës që të kthehet nga Anglia në Kosovë. Mirëpo përgjigjia ka qenë se ai "mund të kthehet kamionave" ashtu siç ka shkuar në Londër.

/express/Shekulli Online/L.B./

Ali Halitin nuk e njeh Drenica. Kush është ai ?
Publikuar: 20:25 / 6.01.2015

Ali Halitin, që u bë i njohur në Facebook, si i pastrehë që flinte në autobus për të shëruar vajzën,nuk e njohin në Poklek, Skenderaj apo Drenas. Yll Latifi, që bëri rastin publik, nuk pranon të flasë.

Ka mjaftuar një fotografi e publikuar në rrjetin social facebook dhe shpërndarja e saj me një mbishkrim, që shumë njerëz të shprehin dhembshurinë dhe solidaritetin.



Në këtë rast po flasim për Ali Halitin, kosovarin, për të cilin u tha se është imigrant ilegal në Angli dhe po fle metrove të Londrës për të mbledhur para, për ta shëruar vajzën e tij të sëmurë në Kosovë.

Nga ky lajm prekës, shumë qytetarë kërkuan ta ndihmojnë këtë person dhe këtë familje. Por derisa në Angli pretendohet se ky person u ndihmua nga bashkëatdhetarët, në Kosovë ekipi i RTK-së për dy ditë me radhë nuk arriti ta gjejë familjen e tij, edhe pse thuhej se është nga fshati Poklek.

Yll Latifi, shqiptari që jeton në Londër, e publikoi i pari fotografinë në të cilën pretendohet se është Ali Haliti, për të cilin u tha se vjen nga fshati Poklek i Skenderajt. Në mbishkrimin e fotografisë theksohej se ky person fle metrove të Londrës dhe punon shumë që të ndihmojë shërimin e vajzës së tij të sëmurë në Kosovë.

Por i kontaktuar nga RTK, tash Yll Latifi, nuk dëshiron të flasë në lidhje me këtë rast.

“Përnime ia nisi qitash me m'dhimt kryet. Edhe niherë po du me t’than, mos ceno të drejtat e njerëzve. T’isha kanë i Kosovës, kishe mujt. Unë nuk kom nevojë me tu përgjigj', ka thënë Latifi.






Sidoqoftë, për të kuptuar për gjendjen e shqiptarit që bëri bujë nëpër media e rrjete sociale, ekipi i RTK-së ka vizituar për dy ditë radhazi fshatin Poklek, prej nga thuhej se është Ali Haliti, në përpjekje për të pasqyruar gjendjen e vajzës së tij.

Por, në Poklek të Drenasit, banorët thonë se nuk njohin person me këtë identitet.

Kryetari i këtij fshati, që është vetëm disa kilometra larg Drenasit dhe nuk bën pjesë në komunën e Skenderajt, siç ishte raportuar, thotë se person me emër të tillë nuk ka në Poklek.

Në fakt, RTK-ja, gjeti një familje të vetme me këtë mbiemër në këtë fshat, por ata u habiten, pasi Ali Halitin nuk e njohin.

Emri i Ali Halitit nuk është i njohur as për zyrtarët e Komunës së Skenderajt e as për ata të Drenasit, të cilët për dy ditë janë munduar ta ndihmojnë RTK-në për ta gjetur këtë familje.

Sidoqoftë, për këtë rast ka reaguar edhe Ambasada e Republikës së Kosovës në Londër. Ata kanë sqaruar se Ali Haliti asnjëherë nuk ka kërkuar ndihmë nga kjo ambasadë që të kthehet në Kosovë dhe se nuk kanë qenë në dijeni për qëndrimin e tij në Mbretërinë e Bashkuar.

Në të njëjtën kohë ata janë zotuar se do ta kontaktojnë atë dhe do t'i ofrojnë ndihmë, sikur që thonë se kanë bërë edhe me bashkatdhetarë tjetër me banim atje. /RTK/