Plumb në kokë ndaj Bin Laden, trupat speciale dhe CIA vepruan në 40 minuta

“Navy Seals” ose siç njihet ndryshe skuadra e forcave speciale amerikanë e specializuar për veprime në ajër, tokë dhe det ka kryer ekzekutimin në terren të Osama Bin Laden sëbashku me operativët e shërbimit inteligjent amerikan CIA. Operacioni sekret i vrasjes së Bin Laden është kryer në Abbodabad, 100 kilometra larg kryeqytetit të Pakistanit Islamabad në një ndërtesë që ishte thuajse tetë herë më e madhe se ndonjë objekt rreth saj. Mësohet se Bin Laden i ka rezistuar sulmit të amerikanëve dhe mëpas është vrarë në të shtëna e sipër me plumb ne koke. Nga të dhënat mësohet se katër persona të tjerë janë vrarë mes të cilëve është një grua e përdorur si karrem. Një zyrtar i administratës amerikane tha se Presidenti Amerikan nuk e kishte ndarë informacionin inteligjent me vende të tjera përpara sulmit ndaj Bin Laden dhe kjo për shkaqe sigurie. Vetëm një numër shumë i vogël personazh brenda qeverisë së Shteteve të Bashkuara të Amerikës ka qenë në dijeni të aksionit. Aksioni i skuadrës së forcave speciale ka zgjatur 40 minuta deri në vrasjen e Bin Laden.