Anulohet testi pranues në Mjekësi, Edukim dhe Ekonomik

Pas
raportimit për parregullsitë që ndodhën të martën gjatë testit të
provimit pranues në Fakultetin e Mjekësisë në Universitetin e Prishtinës
nga “Zëri”, dhe pas reagimit të Organizatës Studentore KISCOMS,
Universiteti i Prishtinës ka marrë vendim që të anulohet ky testim.


“Njoftohen të gjitha njësitë akademike dhe studentët që kanë aplikuar
në ato njësi, në të cilat testet e provimit pranues janë plotësuar me
laps të thjeshtë (laps grafit) dhe nuk kanë siguri (folie siguruese),
menaxhmenti i UP-së, pas kontrolleve që ka bërë, ka vërejtur mundësinë e
manipulimeve dhe njëherit ka vendosur që t'i anuloi dhe t'i shpallë të
pavlefshme. Ripërseritja e provimit pranues do të shpallet në ditët në
vijim”, thuhet në komunikatën e lëshuar nga zyra për informim e
Universitetit të Prishtinës.



Siç mësohet, në Fakultetin e Mjekësisë, ku plotësimi me laps të
thjeshtë të testit është bërë masovisht, testi është anuluar në tërësi.


Ndërkohë, burime zyrtare brenda Rektoratit kanë thënë se testi është
anuluar edhe në Fakultetin e Edukimit, ku janë verifikuar 2-3 raste të
plotësimit të testit me laps të thjeshtë, sikurse edhe në Ekonomik, ku
janë evidentuar 10-15 raste të tilla.


Ky burim nuk hedh poshtë mundësinë që edhe në këto dy fakultete të anulohet testi në tërësi.