Van Gogh nuk vrau veten por e vranë aksidentalisht?!

Historianët e artit gjithnjë e kanë ditur se piktori holandez Vincent van Gogh ka vrarë veten. Por në një libër të fundit autorët thonë se ai vdiq pasi u qëllua në një aksident dhe nuk ja mori vetes jetën. Libri i titulluar “Van
Gogh: The life” do të publikohet të hënën në Britaninë e Madhe dhe është shkruar nga autorët Steven Naifeh dhe Gregory White Smith pas 10 vitesh kërkime. Dihej se piktori vuante nga çrregullime të shëndetit mendor deri në vdekjen e tij misterioze korrikun e vitit 1890. Legjenda thotë se piktori e qëlloi veten në gjoks me një revolver në fshatin Auvers-sur-Oise në veri të Francës. Por shkrimtari që ka fituar çmimin Pulitzer për biografinë e artistit amerikan Jackson Pollock thotë se ka të dhëna që van Gogh vdiq teksa ndodhej me dy djem të cilët kishin një pistoletë që nuk funksionoi siç duhej. Aksidentalisht pistoleta është shkrepur dhe ka qëlluar piktorin e njohur.