Pagjumësia, e lidhur shpirtërisht me adoleshentët

TIRANE- Pagjumësia është çrregullimi i regjimit të gjumit, vështirësia për të rënë dhe për të qëndruar në gjumë. Rekomandohen ushtrime fizike, por jo para orarit të gjumit, sepse stimulojnë trupin të jetë më aktiv dhe nuk ndihet më nevoja për gjumë. Kështu, në këto raste adoleshentëve do t’iu vinte në ndihmë një regjim qetësie para gjumit: si leximi i një libri, dëgjimi i muzikës së lehtë apo bërja e një banjoje që stimulon ardhjen e gjumit.

Gjëja tjetër që duhet të bëjnë, është çaktivizimi i llogarive dhe të kenë një përkushtim më të lartë në studimin e librave. Për pjesën më të madhe është shumë e vështirë, duke qenë se këto mjete komunikimi janë bërë pjesë e pandashme e jetës së tyre, saqë jeta do u dukej e çuditshme pa to. Dhe vërtetë ashtu është. Ajo çka duam të themi, është që adoleshentët nuk është e thënë të shkëputen plotësisht, por të paktën mos të krijojnë varësinë që mund të jetë shkatërruese për regjimin e gjumit, përparimin në shkollë, marrëdhëniet me prindërit etj..

Në moshën e adoleshencës, në raste jo të zakonshme, adoleshentët nuk flenë gjumë jo se nuk u flihet, por mendojnë se janë të rritur tashmë dhe dëshirojnë të flenë në orë të vona. Situata është gati e njëjtë dhe shumë problematike për pjesën më të madhe të adoleshentëve. Ata e mundojnë trupin e tyre, duke qëndruar zgjuar para kompjuterit, televizionit ose duke mësuar për një kohë të gjatë, ndërkohë që organizmit të një adoleshenti i nevojitet 7-8 orë gjumë në ditë.

Javët e para, organizmi i adoleshentit do ta kërkojë gjumin pas një orari të caktuar të natës, por neglizhenca e adoleshentit dhe konsumimi i kohës, do ta kthejë në një situatë, gjendje kronike. Në vazhdimësi, trupi do të jetë i plogësht dhe i pafuqishëm gjatë ditës dhe në maksimumin e aktivitetit të tij, në orët e vona të natës. Shkaqet e insomnisë janë: stresi, shqetësimi emocional ose fizik, faktorë të mjedisit, zhurmat, dritat, prishja e orarit të gjumit. Megjithëse mund të duket i pamundur, aplikimi te adoleshentët për inkurajimin dhe zgjimin në të njëjtën orë çdo ditë,- duke përfshirë dhe ditët e pushimit, është shumë i rëndësishëm për stabilitetin e gjumit tek ata!
(ma.ar/Gazeta Shqiptare/BalkanWeb)