Sulmohet me gurë autobusi i Vevçanit të Strugës

Një autobus me udhëtarë i kompanisë “Sprija” nga Vevçani i Strugës është sulmuar me gurë dje pasdite nga një grup fëmijësh në dalje të fshatit Veleshtë.

Policia e Strugës ka njoftuar për incidentin, duke shtuar se është thyer xhami në pjesën e majtë të autobusit, mirëpo nuk ka pasur asnjë udhëtarë të plagosur.

Incidenti, siç raporton sot INA, menjëherë është lajmëruar në organet e rendit, me ç`rast janë ndaluar dy të mitur të dyshuar si autorë të sulmit. Policia ka ndërmarrë të gjitha masat për të zbardhur incidentin.

Incidentet dhe tensionet në këtë zonë u shtuan muajin e kaluar me djegien e kishës, protestave që pasuan pas karnavalit të Vevçanit, vendbanim që shtrihet në skaj të Strugës në kufirin me Shqipërinë.

Një sulm i tillë ndaj autobusit lokal ka ndodhur edhe disa javë më parë pas incidenteve që përfshin këtë zonë.