THAÇI: SERBIA PO PROVOKON KONFLIKT

Kryeministri i vendit, Hashim Thaçi edhe njëherë ka shprehur qëndrimin kundër mbajtjes së zgjedhjeve lokale serbe në territorin e Kosovës, duke shtuar se ky veprim i Serbisë po provokon një konflikt të hapur me shtetin e Kosovës, që mund të ketë pasoja për rajonin.

Ai këto komente i bëri të mërkurën gjatë hapjes së mbledhjes së Qeverisë.

Shefi i qeverisë ka shprehur qëndrimin kundër pretendimit të Serbisë për mbajtjen e zgjedhjeve në Kosovës, që sipas tij, janë në kundërshtim me Kushtetutën e Republikës së Kosovës.

“Fillimisht në emër të Qeverisë shpreh edhe njëherë qëndrimin e shtetit të Kosovës të institucioneve të Kosovës rreth pretendimit dhe tendencës së Serbisë për të organizuar zgjedhje lokale apo të përgjithshme në territorin e Republikës së Kosovës. Ne vazhdojmë të theksojmë fuqishëm se ky pretendim është në kundërshtim të plotë me ligjet e Kushtetutën e Republikës së Kosovës. Por gjithashtu në kundërshtim të plotë me rezolutë dhe normat tjera ndërkombëtarë mbi të cilat është shpallur pavarësia”, ka thënë Thaçi, siç transmeton Kosovapress.

Për më tepër, ai ka shtuar se Qeveria e respekton parimin e dyshtetësisë për të gjithë qytetarët duke përfshirë këtu edhe qytetarët serbë.

Qeveria e vlerëson këtë pretendim si një përpjekje për agresion ndaj Kosovës, një pretendim për sjellje antievropiane në raport me shtetin e pavarur të Kosovës.

Thaçi ka shtuar se kjo bie ndesh me vlerat evropiane, me parimet e fqinjësisë së mirë dhe që ka tejkaluar angazhimet çfarë do të duhej të ndodhnin në relacionet e fqinjësisë së mirë dhe perspektivës evropiane të shteteve tona.

Prandaj, sipas kryeministrit Thaçi, Qeveria do të përdorë gjithë mekanizmat e vet kushtetues dhe ligjor që ky pretendim i Serbisë të mos realizohet në territorin e Kosovës as për zgjedhje lokale e as ato të përgjithshme.

Madje, ai thënë se, mbajtja e këtyre zgjedhjeve serbe hap një konflikt të ri me shtetin e Kosovës, që mund të ketë pasoja për gjithë rajonin.

“Të vetmet zgjedhje lokale do të organizohen nga institucioneve e vendit tonë dhe assesi nga asnjë vend fqinj. Serbia është duke provokuar një konflikt të hapur me shtetin e Kosovës që mund të ketë pasoja për të gjithë rajonin dhe angazhimet ndërkombëtare në rajon…”, ka thënë kryeministri.

Thaçi ka thënë se përgjigje ndaj këtij pretendimi do të jetë përdorimi i forcës kushtetuese dhe ligjore.