Agjencia amerikane e hapësirës, NASA, krijon atllasin e ri të Gjithësisë

Agjencia amerikane për hulumtime kozmike NASA e ka publikuar në internet atllasin dhe katalogun e përbërë nga 18 000 fotografi të mbi 564 milionë yjeve, galaktikave,asteroideve, planetëve dhe trupave tjerë qiellorë, nga të cilët shumë syresh më parë nuk kanë mundur të shihen apo të identifikohen, si dhe ka publikuar bazën e të dhënave për ata trupa. Atllasi i ri dydimensional i universit është bërë me ndihmën e teleskopit të hapësirës WISE (Wide-field Survey Explorer).Shkencëtarë kanë zbuluar shumë objekte të reja, kurse hulumtimet kanë dëshmuar se në afërsi të planetit tonë ka më pak gurë (asteroide) të madhësisë së mesme sesa është menduar.
WISE është lansuar më 14 dhjetor 2009 dhe deri tash ka grumbulluare mbi 2.7 milionë fotografi dhe 15 trilionë bit shënimesh. Pas analizës së atyre të dhënave dhe me ndihmën e 18 000 fotove të bashkuara si mozaik, është krijuar 2D mapa, në të cilën shohim galaktikën Rruga e qumështit (galaktika jonë). Sistemi ynë diellor është i vendosur diku në rreth dy të tretat larg qendrës së diskut.
Duke pasur parasysh që secili nga mbi 560 milionë objekte mund të jetë asteroid, yll apo edhe një galaktikë e tërë, padyshim se do të mund të gjenden edhe shumë zbulime të reja.