Berisha: Tiranë-Elbasan, tuneli i 100-vjetorit të Pavarësisë

Tiranë, 23 prill 2012, NOA – Kryeministri Sali Berisha deklaroi sot se
tuneli Tiranë-Elbasan do të mbahet mend në shekuj e mijëvjeçarë, si
tuneli i 100 vjetorit të Pavarësisë, raporton agjencia e lajmeve NOA.al.

Kryetari i Qeverisë e bëri këtë deklaratë teksa mori pjesë në përurimin e trasesë së rrugës Tiranë-Elbasan.

Ai falenderoi firmat që po ndërtojnë këtë autostradë të rëndësishme,
duke u bërë me dije se po i bëjnë kombit një dhuratë të madhe në
përvjetorin e 100-të të Pavarësisë.

Kryeministri ripërsëriti se autostrada Tiranë Elbasan është një vepër
madhore e vendit duke siguruar se ajo do të përfundojë brenda mandatit
të ardhshëm katërvjeçar, 2013-2017.

Zoti Berisha nënvizoi se kjo rrugë krijon një nga tregjet më të mëdha të
rajonit tonë dhe shkurton ndjeshëm edhe distancën mes Tiranës dhe
Shkupit.

“Vazhdimi i autostradës Tiranë-Elbasan dhe Elbasan-Korçë në Qafë-Plloç
është dëshmi e kristaltë e forcës ekonomike të këtij vendi dhe është
vetëpërgënjeshtrim i lotëve të krokodilit që kollagjerët derdhin për
ditë”, theksoi kryeministri në ceremoninë e përurimit të trasesë.

Në këtë kontekst, ai e ftoi rishtas opozitën ta vizitojë në mënyrë
kolektive këtë rrugë dhe tunelin, si një akt pendese për kundërshtimin e
saj, pasi siç tha ai, pendesa është tipar i njeriut të qytetëruar.

“Të vijnë ta vizitojnë për të kuptuar se çfarë energjie negative
transmetuan në Parlament kur e bllokuan për 23 orë buxhetin për këtë
autostradë. Të mos korrigjohesh është marrëzi, andaj uroj që të pendohen
për vendimin e tyre”, tha Berisha.

Kryeministri nënvizoi se dimri i ftohtë me reshjet e dëborës që bllokuan
zona të tëra malore u kalua me solidaritet, ndërkohë që paralajmëroi se
pranvera do të shënojë qindra e qindra projekte.

mit/noa.al

O Sali!!!...

Po ti be njehere "rrugen e Pavaresise" (Durres-Vlore), ate qe pershkoi Ismail Qemali dhe mos u tall...

100 vjetori i Pavaresise dhe udha me gjurmet e lirise nuk ndodhet!