Deshmia e të mbijetuarave

Tue 22 May 2012 - 17:57

Dy prej vajzave të plagosura në aksidentin tragjik në Himarë të cilat ndodhen në spitalin e Vlorës kanë treguar për “Ora News” tmerrin që kanë përjetuar gjatë aksidentit ndërsa kanë theksuar se shoferi nuk ka mundur dot të manovrojë duke bërë që autobuzi të rrëzohet në greminë.

“Nuk mbaj mend shumë. Mbaj mend që thërrisnim njëra-tjetrën. Isha tek dera e fundit. Shoferi po bërtiste dhe po mundohej të lëvizte timonin. U mundova të mbahesha por autobuzi u rrëzua dhe më pas po prisja atje derisa erdhën më morën. Në fillim erdhën disa të moshuar dhe më pas po vinin forca të tjera. Në fillim na cuan në spitalin e Himarës, pastaj më sollën këtu”, tregon studentja Ergita Opingari.

“Mbaj mend vetëm përplasjen. Mbaj mend që bërtiti shoferi dhe më pas bërtitën edhe ne. Pash që shoferi nuk ktheu dot timonin dhe autobuzi nuk mori kthesën por eci drejt. Kemi qënë 36-37 persona në autobus. Mbaj mend vetëm momentin e rënies dhe më pas nuk mbaj mend asgjë”, tregon për “Ora News” një studente nga Lushnja.