Ismail Kadare padit Nexhmije Hoxhën për origjinalin e veprës “Dimri i Vetmisë së Madhe”

Ditën e djeshme, mediat kanë raportuar se Ismail Kadare i është drejtuar Gjykatës së Tiranës, për të paditur Nexhmije Hoxhën, pasi shkrimtari pretendon se dorëshkrimin origjinal të veprës “Dimri i Vetmisë së Madhe” mbahet padrejtësisht nga zonja Hoxha. Në objektin e kësaj padie kërkohet nga ana e Gjykatës së Tiranës: “Rifitimi i të drejtës së autorit mbi veprën artistike, dorëshkrimi origjinal i librit “Dimri i Vetmisë së Madhe” dhe rikthimi i dorëshkrimit origjinal i veprës “Dimri i Vetmisë së Madhe” në posedim të z. Ismail Kadare. Ndërkaq, padia në fjalë është hedhur në short dhe pritet të shqyrtohet në ditët në vijim nga ana e gjyqtarit Bledar Abdullai.

Pak kohë më parë, Nexhmije Hoxha i është drejtuar Prokurorisë së Tiranës me një kallëzim kundër gazetarit Blendi Fevziu, të cilin e akuzonte se kishte vjedhur dhe publikuar më pas në librin e tij, ditarët e Enver Hoxhës. Por pas verifikimeve në Arkivën e Shtetit, ky i fundit doli i pafajshëm./alb-observer.com/