Vivaldi dhe perlat e muzikës klasike (video)

Antonio Luçio Vivaldi lindi më 4 mars 1678 në Venecia, Itali dhe vdiq më 28 korrik 1741, në Vjenë. Mësoi violinën nga babai i tij Xhovani Batista.

Vivaldi kishte një problem shëndetësor, që e quante ngushtim të kraharorit; bëhej fjalë për azmën. 14 vjeç nisi të studionte në një shkollë biblike. Në vitin 1703, përfundoi studimet dhe u emërua prift, me emrin fetar “Prifti i Kuq”, për shkak të ngjyrës së flokëve. Më 1704 u bë profesor violine në Jetimoren për vajza, “Pio, Spitali i Mëshirës”, në Venecia, ku ka gjetur frymëzim për shumicën e simfonive e kantatave të tij.

Më 1705 u publikua përmbledhja e parë me veprat e tij, e titulluar “Raccolta” (Koleksioni). Një fakt i rëndësishëm është rizbulimi i pjesës më të madhe të repertorit të tij, në fillim të shekullit XX, në Torino dhe Gjenevë, kohë pas vdekjes së tij.

Muzika e Vivaldit është novatore, pasi theu traditën në mënyrën e të kompozuarit, përmirësoi strukturën e koncerteve, ku kërkonte kontraste harmonike, duke krijuar melodi dhe skema të reja interpretimi. Vivaldi njihet si një prej artistëve që solli muzikën baroke. Johan Sebastian Bah u ndikua jashtë mase prej muzikës së tij. Vivaldi është pa dyshim, një nga kompozitorët më të mëdhenj italianë, me mbi 500 koncerte, 46 opera, simfoni, 73 sonata, muzikë dhome, si dhe Muzikë të Shenjtë.

Vepra e tij më e famshme është “Katër Stinët”, kompozuar në vitin 1723. Në thelb, ajo ishte si një poemë për natyrën, ku ai u mundua të realizonte tingujt e katër stinëve. Pranvera është një pjesë, që shpesh përdoret për ceremoni të rëndësishme dhe vazhdon të konsiderohet një nga perlat e muzikës klasike.