Emigrantët shqiptarë rrezikojnë pensionet

Nga shtatori Instituti IKA do të ndërpresë dhënien e pensioneve për emigrantët. Dalin nga skema edhe minoritarët në Jug.

Ervin Koçi

Një nga shkurtimet drastike të skemës financiare të qeverisë “Samaras”, do të jenë edhe pensionet, sidomos ato për të huajt jashtë Greqisë dhe për emigrantët. Këtyre të fundit shteti grek duket se do t’u mohojë çdo të drejtë, nisur edhe nga lëvizjet më të fundit të qeverisë, për të larguar sa më shumë emigrantë nga vendi.

Lajmi më tronditës për emigrantët por edhe për minoritetin grek në vendet fqinj, vjen nga entet e pensioneve në Greqi që kanë pësuar dëme kolosale pas reduktimit të borxhit grek. Këta të fundit duke mos marrë më financime nga qeveria, do të reduktojnë në maksimum dhënien e pensioneve për emigrantët dhe për shtetasit homogjen jashtë Greqisë. Lajmi është bërë i ditur nga zyrtarët e Institutit “IKA”, më i madhi në Greqi për sigurimet, të cilët kanë thënë se deri në shtator ata do të ndërpresin dhënien e pensioneve për shtetasit e huaj. Pothuajse çdo ditë specialistët e ekonomisë theksojnë se në se nuk gjendet një zgjidhje do të ketë probleme në të ardhmen në pagesat e mijëra pensionistëve dhe këtu përfshihet edhe skema më e madhe, siç është Instituti i Sigurimeve Shoqërore “IKA”, ku janë të siguruar shumica e emigrantëve shqiptarë. Brenda këtij viti, qeveria greke mësohet se do të ndërpresë pensionet edhe të Entit të Institutit Agrar të Greqisë, “OGA”, nga i cili paguhen pensionet e të paktën 17000 minoritarëve shqiptarë. Në një deklaratë për televizionin shtetëror, drejtori i “OGA”-s tha se: “tani e tutje asnjë prej homogjenëve nga Rusia, Bullgaria, Egjipti dhe Shqipëria nuk do të marrë pensionin prej 360 eurosh”.