Në kujtim të rilindasit Petro Nini Luarasi

Petro Nini Luarasi ka lindur më 22 prill 1865 dhe vdiq më 17 gusht 1911. Ishte veprimtar i Rilindjes Kombëtare, publicist e pedagog, “Mësues i Popullit”.

Lindi në Luaras të Kolonjës, në një familje muratori. Ishte nxënës në shkollën e Qestoratit të Koto Hoxhit. Punoi si mësues në fshatrat e Kolonjës, ku u mësonte fëmijëve fshehurazi gjuhën shqipe dhe përgatiti një grup shokësh si mësues. Më 1887 hapi në Ersekë shkollën e parë shqipe dhe pak më vonë, 1892-1893, hapi shkolla shqipe në krahinën e Kolonjës e të Vakëfeve. Punoi si drejtor dhe mësues i Mësonjëtores së parë shqipe të Korçës.

Në emigracion, në Amerikë, 1904-1908, mori pjesë gjallërisht në lëvizjen kombëtare, ishte nismëtar i shoqërive patriotike “Mall i mëmëdheut” dhe “Pellazgu”, i krijimit të komiteteve të fshehta për lirinë e Shqipërisë.

Ishte delegat në Kongresin e Manastirit, 1908. Më 1909-1911 ishte drejtor i shkollës së Negovanit. Për veprimtarinë patriotike, arsimore e shoqërore u përndoq nga xhonturqit dhe Patrikana e Stambollit.

Vdiq i helmuar prej tyre në Ersekë, më 17 gusht 1911. /alb-observer.com/