Raundi i përballjeve Obama-Romney

Barak Obama dhe rivali i tij republikan, Mitt Romney, po përgatiten për fazën e ardhëshme të fushatës, të cilën e përbëjnë debatet presidenciale.

E mërkura do të jetë dita që do t’i vërë për të parën herë dy kundërshtarët përballë njëri-tjetrit në debatin e parashikuar të mbahet në Denver të Kolorados.

Ekonomia do të jetë tema kryesore e përballjes, por nuk do të mungojnë as kujdesi shëndetësor si dhe roli i qeverise.

Sipas Zërit të Amerikes, mjaft analistë janë të mendimit se ish-guvernatori i Masaçusetsit eshte ai qe duhet të përpiqet më shumë për të bindur audiencen.

Presidenti preku çështjen e ekonomisë në fjalimin e tij të përjavshëm radiofonik, ku kritikoi Kongresin, veçanërisht republikanët, se janë bërë pengese për planin e mbrojtjes së pronarëve të shtepive, teksa rimëkëmbja e tregut të banesave duket qarte se kërkon më shumë kohë.

Shefi i Shtëpisë së Bardhë, nga ana tjetër është kritikuar se nuk ka bërë sa duhet për krizën e tregut të banesave.

Një lajm i mire per ekonomine, e qe i vjen ne ndihme Obamës, janë shifrat e rishikuara të Departamentit të Punës, te cilat tregojne se vendi ka më tepër njerëz të punësuar sot se sa kur Presidenti mori detyrën në janar të vitit 2009.

Këto shifra kundërshtojnë pretendimin e Romney-t se vendi ka humbut disa qindra mijëra vende punën nën administratën Obama.

Sondazhet vazhdojne t’i japin presidentit nje avantazh të ndjeshëm në shumë nga shtetet që pritet të vendosin rezultatin e zgjedhjeve të 6 nëntorit.