Rritet numri i të vdekur nga “Sandy”, Nju Jorku nën pushtetin e ujit

Mediat amerikane flasin për shtimin e numrit të personave që kanë humbur jet si pasojë e uraganit “Sandy”. Mendohet që deri më tani të kenë humbur jetën 26 persona, ndërsa 7.5 milionë persona kanë mbetur pa energji elektrike.

Mëngjesin e sotëm, pamja e Nju Jorkut ka qenë e ngjashme me ato të filmave ku paraqiten qytete të shkatërruar si pasojë e stuhive.

Qindra- mijëra persona u shpërngulën nga frika, ndërsa njerëzit thonë se kanë kohë që nuk shohin një stuhi të tillë.

Shenjat e përmbytjeve duken ngado në rrugët e Nju Jorkut, ndërkohë që autoritetet po bëjnë çdo gjë për të përmirësuar situatën.

Qytetet kryesore amerikane nga Uashingtoni në Nju Jork kanë pezulluar sistemet e transportit publik (trena, autobusë, aeroplanë) dhe miliona njerëz janë detyruar të qëndrojnë në shtëpitë e të mos dalin në punë. Bashkia e Manhatan-it ka ndërprerë linjën elektrike për të parandaluar dëmtimin e rrjetit të energjisë. Qyteti i Baltimorës në Maryland ka ndaluar çdo qarkullim të makinave, me përjashtim të atyre të policisë dhe spitaleve. Erërat kanë arritur shpejtësinë maksimale deri në 150 kilometra në orë. Miliona njerëz nga Virgina ne shtetin Maine janë pa energji elektrike. Më në brendësi, disa zona malore janë mbuluar nga rreth një metër e gjysmë dëborë e lagësht.

Parashikuesit e motit thonë se stuhia po udhëton me shpejt sesa ishte parashikuar në drejtim të perëndimit me 44 kilometra në orë.

Presidenti Barak Obama ka anuluar veprimtaritë e tij të fushatës zgjedhore për të monitoruar uraganin nga Shtëpia e Bardhë. Ai u bëri thirrje amerikanëve që të marrin parasysh paralajmërimet lidhur me natyrën e rrezikshme të uraganit Sandy.

“Mesazhi më i rëndësishëm që kam për publikun tani është: ju lutem dëgjoni se çfarë thonë zyrtarët shtetërore dhe vendorë. Kur ata ju thonë të evakuoheni, ju duhet të evakuoheni. Mos vononi, mos ngurroni, mos vini në pikëpyetje udhëzimet që u janë dhënë, sepse kjo është një stuhi shumë e fortë dhe mund të ketë pasoja fatale në qoftë se njerëzit nuk veprojnë shpejt“, tha Obama.

Autoritetet në 9 shtete dhe kryeqytetin Uashington, DC kanë shpallur gjendjen e jashtzakonshme, shkollat jane mbyllur, ndërsa zyrat federale u mbyllën të hënën dhe do të qëndrojnë të mbyllura edhe sot, të martën.

Parashikuesit e motit thonë Sandy pritet të bashkohet me një sistem të motit të ftohtë, duke u shndërruar në “super-stuhi pas-tropikale” me reshje të mëdha shiu e bore në zonat malore. Në Nju Jork autoritetet urdhëruan evakuimin e 375.000 njerëzve nga pjesë të ulëta të qytetit, ndërsa tregjet e aksioneve u mbyllën dje në mënyrë të paplanifikuar, për herë të parë që mbyllen në këtë mënyrë nga dita e sulmeve terroriste të 11 shtatorit 2001.

Zyrtarët thonë se njerëzit, të cilët tani refuzojnë të evakuohen dhe më vonë duhen shpëtuar, do të vinin në rrezik jetën e punëtorëve të emergjencës.

Uragani Sandy shkaktoi vdekjen e të paktën 65 personave në Karaibe javën e kaluar para se të lëvizte në drejtim të Shteteve të Bashkuara.
Burimi: tema