Greqi, emigrantëve iu hiqet e drejta e votës në zgjedhjet vendore

Greqia iu heq të drejtën e votës emigrantëve, duke shpallur antikushtetuese dispozita të caktuara të ligjit të miratuar nga Qeveria Papandreu.

Këshilli i Shtetit, në një seancë me dyer të mbyllura, shpalli antikushtetuese, pothujase unanimisht, dispozitat e ligjit 3838/2010 (i njohur si "Ligji Ragousi"), që iu mundësonte shtetasve të huaj të merrnin pjesë duke kandiduar dhe duke votuar në zgjedhjet vendore në Greqi. Sipas vendimit, e drejta për të votuar dhe për t’u votuar është e kufizuar për qytetarët grekë dhe nuk mund të zgjatet, pa shqyrtuar dispozitën përkatëse të Kushtetutës.

Antikushtetuese u shpallën gjithashtu edhe dispozitat që e bënin të lehtë marrjen e shtetësisë greke nga emigrantët. Këshilli vendosi që mënyra e marrjes së nënshtetësisë greke, sipas ligjit përkatës 3838/2010, është në konflikt me kërkesat kushtetuese.

Ndërkohë Qeveria Samaras ka përgatitur një ligj të ri për dhënien e shtetësisë tek të huajt, me kritere të tjera më të ashpra, të cilin pritet ta dërgojë së shpejti për votim në Parlament.
/BalkanWeb