Fullani: 2012-a vit i vështirë, kanë rënë eksportet

Guvernatori i Bankës së Shqipërisë, Ardian Fullani ka raportuar sot në Komisionin e Ekonomisë për veprimtarinë e BSH-së për vitin 2012, ku ka theksuar se viti i kaluar ka qenë i vështirë për ekonominë në vend.

“Banka e Shqipërisë ka përmbushur detyrat ligjore gjatë 2012-s”, tha Fullani, duke shtuar se gjatë këtij viti inflacioni ka qenë nën kontroll.

Për ekonominë, siç theksoi Fullani, 2012-a ka qenë një vit i vështirë, për shkak të rënies së eksporteve.

“Viti 2012 i vështirë për ekonominë. Eksportet ranë për shkak të krizës te fqinjët. Rënia e kërkesës në vend për shkak të pasigurisë. Ndikoi negativisht edhe moti i keq në tremujorin e parë të 2012-ës”,- tha Fullani.

Gjithashtu Fullani shtoi se borxhi publikë është rritur gjatë vitit 2012, si dhe është rritur numri i institucioneve jo bankare. Sipas numrit një i bankës qendrore, të ardhurat publike u rritën me 0.2 për qind. Tregu valutor ka qenë në balancën e kërkesë-ofertës, ndërsa ka pasur një ecuri të dobët në kredidhënie nga bankat private gjatë 2012-ës.

“Gjatë vitit 2012 ekonomia u zhvillua nën potenciale”,- tha ai më tej.

/Shekulli Online/Përgatiti: E.Sh/