Donin të shpëtonin nga përjashtimi, tre nxënësit vodhën dhe dogjën regjistrat e shkollës

Tre nxënës të shkollës së mesme në Velipojë janë ndaluar nga policia pasi kanë menduar ta zgjidhin problemin e tyre me frekuentimin duke dëmtuar regjistrat e shkollës. Kështu, E.P. 16 vjeç, J.D. 17 vjeç dhe E.S. 16 vjeç, që të tre banues në fshatin Velipojë, në orët e vona duke u gdhirë e hëna kanë hyrë në shkollën e mesme “Nikollë Zogarjani” dhe kanë marrë regjistrat në sekretari. Më pas I kanë asgjesuar në afërsi të lokalit që ishte pronë e babait të njërit prej tyre.
Mësohet se nuk ka qenë e vështirë që të identifikohen autorët e ngjarjes, pasi në vendngjarje kishte mjaft gjurmë dhe pas ndalimit ata kanë thënë se e kanë kryer këtë vepër penale pasi kishin shumë mungesa pa arsye dhe rrezikonin përjashtimin./alb-observer.com/