Erdogan, “mësime” demokracie Egjiptit

Kryeministri turk Rexhep Tagip Erdogan ka dënuar ditën e sotme grushtin e shtetit të zhvilluar në Egjipt që rrëzoi nga pushteti presidentin Morsi. Gjithashtu, në fjalën e tij ai dënoi edhe hipokrizinë e qeverive perëndimore që u treguan të gatshme të mbështesnin këtë veprim që, sipas Erdogan, shkon ndesh me demokracinë.

“Është shumë gjë e keqe për vendet ku organizohen grushte shteti. Këto vijnë ndesh me demokracinë”, theksoi ai gjatë një deklarate televizive.

“Ata që bazohen tek fuqia e armëve, ata që bazohen tek forca e masmedias, nuk mund të ndërtojnë dot demokracinë. Demokracia mund të ndërtohet vetëm përmes kutive të votimit”, shtoi ai.

Erdogan dënoi edhe qëndrimin e fuqive perëndimore, të cilat nuk e quajtën grusht shteti ndërhyrjen e ushtrisë egjiptiane për të rrëzuar Morsin. “Perëndimi dështoi në testin e sinqeritetit. Më vjen keq, por demokracia nuk i pranon këto”. Kryeministri turk ftoi popullin egjiptian që të mendojë me gjakftohtësi dhe mos lejojë të ndodhin të tilla veprime në vendin e tyre. “Çdo grusht shteti, pa përjashtmin, e çoi Turqinë dekada mbrapsht, paralizoi ekonominë turke. Çdo grusht shteti i kushtoi shumë shtrenjtë vendit, kombit, brezave të rinj”.

Ushtria turke ka ndërhyrë duke organizuar katër grushte shteti nga viti 1960 deri më sot. /alb-observer.com/