Teksas, mamaja shpëton vajzën që torturohej prej 9 muajsh

Një mama, në Teksas, arriti të shpëtonte vajzën e saj nga një shtëpi ku mbahej e burgosur dhe e torturuar për nëntë muaj rresht.

Tre burra u arrestuan këtë javë për mbajtjen e gruas të burgosur dhe për torturimin që i bënin asaj prej nëntë muajsh, raporton "Mail Online".

Rusty Sherrill 57 vjeç, James Ruff 23 vjeç dhe Max Ruff 21 vjeç grabitën gruan, identiteti i së cilës nuk bëhet i ditur, në shtator të vitit 2011 dhe e mbajtën të mbyllur si dhe e torturuan deri në maj të vitit 2012.

Mamaja e viktimës, e shpëtoi të bijën nga shtëpia ku mbahej e mbyllur dhe e dërgoi atë në spital.

Gjendja e saj ishte shumë e rëndë. Gruaja e dhunuar qëndroi për një muaj rresht në gjendje kome në spital.

Mësohet se gruaja e dhunuar ka pasur një lidhje me burrin e quajtur Sherrill dhe menjëherë pas ndarjes me të, ajo është marrë peng nga tre personat e lartpërmendur.

/Shekulli Online/ E.B./