Armët kimike në Kosovë?

A do ta zgjidhë qeveria e Kosovës një ngërç ndërkombëtar? Pas Shqipërisë po përmendet si opsion Kosova. Gazeta “Express” bën me dije se, tani pothuajse është i sigurt refuzimi që Qeveria shqiptare do t'i bëjë depozitimit dhe shkatërrimit të armëve kimike të Republikës së Sirisë. Disa burime bëjnë të ditura se si opsion i dytë, në rast se Shqipëria refuzon, do të mbetet si mundësi Republika e Kosovës. Ka pas diskutime të kësaj natyre edhe në vendet e NATO-s. “Ekzistojnë dy mundësi, që ato armë kimike për momentin të depozitohen në strehimorët e aeroplanëve ushtarak nën malin e Goleshit, ose si mundësi e dytë shkatërrimi i tërësishëm i tyre në furrat e shkritores së Trepçes”, thonë burimet.

Sipas të njëjtave burime qeveria e Kosovës nuk e ka përjashtuar tërësisht ketë opsion, por ka përmendur investime në fushën e mbrojtjes së ambientit, si kompensim për ketë shërbim që po i bëhet në zgjidhjen e këtij ngërçi ndërkombëtar. Arsyeja përse është gjetur Kosova në këtë kombinim, thuhet sipas burimeve të mirinformuara, janë raportet e mira që Qeveria e Kosovës ka me Shtetet e Bashkuara të Amerikës. “Në rast se kryhet ky shërbim, mund të ndodhë edhe ndonjë njohje e rëndësishme, që deri më tani nuk është paramenduar”. Ndërsa, Ministria e Punëve të Jashtme dhe ministri Hoxhaj, që kur ka filluar konflikti në Siri ka qenë vazhdimisht aktiv me komunikata të ndryshme, duke e krahasuar atë konflikt me luftën në Kosovë.

/Shekulli Online/ E.L./