Vdekja e këngëtares, burg autorit

Gjykata e Tiranës e vlerësoi të ligjshëm arrestimin e kosovarit Aziz Kelmendi për akuzën e vrasjes me dashje të 21-vjecares Elsiana Hidershaj, apo sic njihej ndryshe Emmy.
I akuzuari, për të cilin gjykata shpalli masën “burg pa afat”, ndodhej në sallë dhe sipas avokatit të tij gjatë seancës me dyer të mbyllura ai ka pretenduar se ngjarja ka ndodhur nga pakujdesia.

Në vijim të kësaj i pandehuri ka kërkuar një masë më të lehtë, duke shpjeguar versionin e tij për grindjen mes tij dhe viktimës, e cila mbeti e plagosur rëndë dhe më pas ndërroi jetë në Spitalin Ushtarak.

47-vjecari ka pranuar se kishte patur një raport dyvjecar me këngëtaren, histori e cila sipas tij ka qenë drejt mbylljes.

Sipas tij, ai kishte shkuar në lokal për t’i lënë një porosi dhe duke qenë se ndodhej nën shoqërinë e një femre tjetër, pikërisht këtu kanë nisur mosmarrëveshjet.

I pandehuri, sipas avokatit të tij, ka shtuar se pas sherrit vajza ka tentuar të hipë në makinën e tij, e cila ishte në ecje, duke sjellë kështu edhe tërheqjen zvarrë të saj.

Por përkundër këtij qëndrimi, prokuroria dhe policia kanë dyshime të tjera. Hetuesit pohojnë se vajza është përplasur qëllimisht, madje edhe pas kësaj 47-vjecari e ka goditur sërish me makinën e tij.

Elsiana Hidershaj u bë e njohur katër vitet e fundit për interpretimin e disa këngëve.