Shqipëria dhe Kosova nuk ftohen në konferencën e sigurisë

Në organizim të Ministrisë së Brendshme të Maqedonisë dhe Fakultetit për Sigurim, muajin e ardhshëm në Manastir do të mbahet konferenca shkencore mbi sigurinë në Ballkan. Në këtë konferencë, që do të mbahet më 27 dhe 28 maj të këtij viti, janë ftuar përfaqësues të qeverive dhe profesorë universitarë nga Serbia, Kroacia, Rumania dhe republika serbe, ndërsa nuk është ftuar asnjë përfaqësues nga Shqipëria dhe Kosova. Pjesëmarrës në konferencën e Manastirit do të jenë edhe përfaqësues të lartë të dikastereve të sigurisë. Takimi mbahet jashtë vëmendjes së medieve, ndërsa informacione interne bëjnë të ditur se ndër temat e konferencës do të jetë krimi i organizuar, korrupsioni, por edhe “kriminaliteti dhe mafia shqiptare”. Përfaqësues shqiptarë në qeveri theksojnë se nuk kanë njohuri për një konferencë të tillë, njofton ‘INA’.