Arrestime në komunën e Prishtinës

Policia e Kosovës ka
arrestuar gjashtë zyrtarë të lartë të komunës së Prishtinës. Siç
njoftohet, arsyeja e arrestimit është keqpërdorimi i pozitës zyrtare nga
ana e zyrtarëve komunalë.


Ndërkohë, sipas burimeve policore,
emrat e të arrestuarve janë Ridvan Shahini, drejtor i infrastrukturës,
Ekrem Rexha, shef i prokurorimit, Qazim Bajrami, kryesues i organit
mbikëqyrës, Halil Fejziu, anëtar i organit mbikëqyrës, Hazir Krasniqi,
anëtar i organit mbikëqyrës dhe Refik Sadiku, kryetar i organit
mbikëqyrës.

Drejtoria e Hetimeve të Krimeve Ekonomike dhe Korrupsionit në Policinë e
Kosovës njofton se, gjashtë të arrestuarit dyshohen të kenë kryer
veprën penale duke keqpërdorur autoritetin e tyre zyrtar.

Si rrjedhojë e ngjarjes, pas marrjes në pyetje nga zyrtarët policorë,
gjashtë të arrestuarit me urdhër të prokurorit, iu është caktuar masa e
ndalimit në 48 orë.

Këto arrestime pasuan akuzat politike të kryetarit të Prishtinës Isa Mustafës kundër Policisë së Kosovës.

Mustafa kishte akuzuar pjesëtarët e policisë se gjatë kontrollit në
objektin e komunës, një grup i hetuesve ishte sjellë në mënyrë brutale.

Pas këtyre deklaratave kishte reaguar Ministria e Punëve të Brendshme, por edhe zyrtarët e policisë së Kosovës.

Ndërkohë, pak ditë më pas, 6 zyrtarët e lartë të komunës që udhëhiqet nga z.Mustafa, tashmë gjenden në paraburgim.