Kërkesa e serbëve për shtetësi ruse, është “thirrje për ndihmë”

Ministri i jashtëm i Serbisë, Vuk Jeremiq, tha se kërkesa e serbëve të Kosovës për shtetësi ruse, është “thirrje për ndihmë”.

Sipas tij, kjo nuk është aq shumë një përpjekje për emigrim, aq sa është një thirrje për mbrojtje. Jeremiq, në një konferencë për shtyp në Astana të Kazakistanit theksoi se“komuniteti ndërkombëtar u ka garantuar serbëve të Kosovës mbrojtje nga shtypja”, por ata nuk e kanë këtë, dhe shtoi se serbët e Kosovës kanë vendosur se “mbrojtësi i tyre më i mirë dhe agjencia më e fuqishme në këtë çështje, mund të jetë partneri dhe miqtë e tyre”, e kjo sipas Jeremiq-it është Federata Ruse.