“Concordia”, gjenden 4 trupa, mes tyre dhe një 5-vjeçare

GIGLIO - Autoritetet italiane bënë të ditur se në pjesën e përmbytur të anijes Concordia janë gjetur sot trupat e pajetë të 4 pasagjerëve që rezultonin të zhdukur, mes të cilëve edhe vajza 5-vjeçare, Dayana Arlotti.
Mësohet se zbulimi i këtyre trupave u bë i mundur pasi skuadrat e kërkimit arritën të depërtonin në disa pjesë të përmbytura, ku nuk kishte akses më parë.

5-VJEÇARJA NË KROCERË ME TË ATIN
Ky udhëtim duhet të ishte një moment relaksi dhe lehtësimi për babain e vogëlushes Dayana Arlotti, i cili kishte menduar të festonte me vajzën e tij fitoren me sëmundjen dhe përballimin me sukses të dy transplanteve të vështira.

Ishte si një rilindje për 36-vjeçarin Williams Arlotti, që nuk zgjati shumë pasi u shua bashkë me vogëlushen e tij në fund të detit. Dëshimtarët tregojnë se vajza kishte rrëshqitur në pjesën e përmbytur të anijës dhe i ati ishte hedhur në ujë në përpjekje për ta shpëtuar, por nuk e arriti qëllimin për shkak të kushteve të tij fizike. Ai nuk arriti të dilte nga uji bashkë me vajzën e tij.

NGJARJA
Anija “Costa Concordia”, me 4 200 persona u përplas me shkëmbinj nënujorë dhe u fundos në ujëra të cekëta në 13 janar të këtij viti. Kapiteni i anijes, Francesco Schettino po përballet në gjykatë me akuzat e vrasjes nga pakujdesia dhe të braktisjes së mjetit në vështirësi.

(er.nu/BalkanWeb)