Pendarovski: Gruevski e Ahmeti të pinë nga një çaj në Çarshi

Këshilltari i dy ish presidentëve për çështje të sigurisë, Stevo Pendarovski është i mendimit se politikbërja në Maqedoni me vite të tëra i kanë lënë pas dore marrëdhëniet ndëretnike.
Sipas tij, pas vitit 2002 e këndej te partitë politike maqedonase është krijuar përshtypja se me nënshkrimin e Marrëveshjes së Ohrit do të rregullohet gjithçka në Maqedoni.
“Por, ky është një vlerësim i gabueshëm dhe i papranueshëm. Politikanët në Qeveri duhet të kuptojnë se ka jetë të mirë dhe zhvillim ekonomik kur ka marrëdhënie të mira ndëretnike.
Sfera e marrëdhënieve ndëretnike nuk është matematikë. Asnjëherë nuk i kemi parë Ahmetin dhe Gruevskin të pinë kafe apo çaj në Çarshi apo diku tjetër.
Ata dy takohen rrallë dhe vetëm kur ndodh diçka e madhe. Njerëzit e parë të BDI-së dhe VMRO-DPMNE-së duhet së paku dy herë në javë të takohen. Integriteti i institucioneve të shtetit është shumë i rëndësishëm.
Ato duhet të jenë të pavarura dhe të veprojnë në mënyrë të paanshme, duke mos bërë dallime etnike”,thekson për“Zhurnal plus” Pendarovski.