BDI dëshiron shqipen, VMRO nuk e jep

Fri 14 Jun 2013 - 14:21

Vllado Popovski, njëri nga hartuesit e Kushtetutës së Maqedonisë, ka shtruar tërthorazi idenë për mundësinë e sjelljes së një Ligji, me të cilin do të zgjidhej përfundimisht çështja e përdorimit zyrtar të gjuhës shqipe, si gjuha e dytë zyrtare e vendit.
Ermira Mehmeti, deputete e BDI-së në parlamentin e Maqedonisë e konsideron qëndrimin e Popovskit, si një qëndrim të guximshëm politik, i cili si i tillë duhet mirëpritur. Ajo vlerëson se prononcimi i Popovskit, është ndër të paktët, në mos i vetmi, nga një maqedonas etnik, dhe hartuesi i kushtetutës, i cili pranon se në vitin 2001 u arrit statusi gjuhë zyrtare për gjuhën shqipe.
“Por, ajo çfarë e pengon në praktikë, është mungesa e vullnetit dhe guximit nga klasa politike maqedonase për ta lejuar këtë. Me fjalë tjetra, Kushtetuta e zyrtarizon, por ka tendenca për pengim të zyrtarizimit përmes ligjeve, gjë që pastaj hap dilemën, nëse ligjet janë kushtetuese ose antikushtetuese. Fryma e Marrëveshjes së Ohrit promovon zyrtarizimin e gjuhës shqipe, ndërsa letra e pengon atë, për fat te keq”, vlerëson deputetja, Ermira Mehmeti.
Por nga ana tjetër deputetja Silvana Boneva nga radhët e partisë më të madhe në vend, VMRO-DPMNE konsideron se Ligji për përdorimin e gjuhëve në mënyrë të qartë përcakton kornizën për përdorimin e gjuhëve të bashkësive etnike në R. e Maqedonisë, në nivel lokal, në komunikim me qendrën, me institucionet.
“Mendoj se ligjin e sollëm me konsensusin maksimal të mundshëm në Kuvendin e Maqedonisë, në përputhje me Marrëveshjen e Ohrit. kushtetutën dhe mendoj se kjo u përshëndet edhe nga nënshkruesit e Marrëveshjes së Ohrit, ashtu që kjo sferë e përdorimit të gjuhëve të komuniteteve, mendoj se është e rregulluar”, theksoi Silvana Boneva.