AKEP: 4.5 milionë shqiptarë kanë të paktën një numër celular

TIRANE – Lajmifundit - Në raportin vjetor të Autoritetit të Komunikimeve Elektronike dhe Postare për vitin 2010 të bërë publik në mars 2011, thuhet se numri i përdoruesve të telefonisë së lëvizshme arriti në afërsisht 4.5 milion, e cila përbën një normë penetrimi (numri i përdoruesve për 100 banorë) prej 140%, e cila është 11 pikë përqindje më e lartë se në vitin 2009, si edhe më e madhe se niveli mesatar prej 122% në vendet e BE në vitin 2009.
Sipas raportit të AKEP, përdorimi i shërbimeve celulare nga pajtimtarët ka pasur rritje të ndjeshme duke filluar nga viti 2009. Kjo rritje në vitin 2010, ka qënë akoma më e madhe. Gjatë vitit 2010 nga një perdorues celular mesatarisht gjatë një muaji, përdorimi i thirrjeve telefonike është rritur ndjeshme me 60-70%, ndërsa përdorimi mesatar i SMS-ve ka pasur rënie me 16%.
AKEP verën se tritje më të mëdha të përdorimit të shërbimeve janë vënë re për përdoruesit e Vodafone, të cilët gjatë vitit 2010 kanë kryer mesatarisht 92 minuta telefonata dalëse në muaj dhe 204 minuta komunikim telefonik (thirrje dalëse dhe të marra) në muaj.
Raporti vë në dukje se reduktimi i tarifave celulare në vitet e fundit, si rezultat i ndërhyrjeve në këto tarifa nga AKEP si dhe nga konkurrenca më e lartë në treg, ka përmirësuar pozicionin e Shqipërisë në krahasim me vendet e BE duke e cuar rreth niveleve mesatare të këtyre shpenzimeve (nga nivelet maksimale deri në vitin 2008). Ky pozicion rreth nivelit mesatar të tarifave në vendet e BE, ka vazhduar edhe në vitin 2010. Megjithate Shqiperia mbetet ne rajon mbi mesataren e tij dhe ky është tashmë objektivi dhe i nderhyrjes nëpërmjet metodollogjisë të kostove të aplikuar ne muajn Mars, me qëllim që në një afat të shkurtër ne të zbresim tarifat në nivelin mesatar të Rajonit.