"I kemi gjobitur 4-5 herë dhe sërish vazhdon të pihet duhan"

Duhani vazhdon të pihet pa problem në lokalet e kryeqytetit. Vetëm dy javët e para të dhjetorit janë gjobitur jo pak por 120 subjekte që nuk i respektojnë rregullat e vendosura nga Instituti i Shëndetit Publik. Në 1000 subjekte të inspektuara, janë gjobitur 100 për pirjen e duhanit dhe 20 të tjera për mungesën e librezës së shëndetit. Këtë fakt e ka pohuar për “Shekullin” drejtori i Politikave në Ministrinë e Shëndetësisë, Pëllumb Pipero. “Drejtoria e Shëndetit Publik në kryeqytet është organizuar me 14-16 grupe pune të ndarë në zona, të cilët kanë bërë inspektime në të gjithë lokalet e kryeqytetit. Çdo ditë ata marrin urdhra nga Drejtoria dhe vazhdojnë kontrollin për zbatimin e ligjit.”

Numrin më të madh të gjobave ikanë marrë lokalet e natës. Zyrtarët e Drejtorisë së Shëndetit Publik, propozojnë që ligji të rishikohet, duke parashikuar edhe vendosjen e gjobave për duhanpirësit dhe jo vetëm për lokalet ku konstatohet se pihet duhan. “Qëllimi ynë nuk është vënia e gjobave, por të ndërgjegjësojmë jo vetëm lokalet, por dhe personat për mospirjen e duhanit, sidomos në ambiente publike. Vënia e gjobave nuk është ndëshkim, kjo tregon se kemi hedhur një hap të rëndësishëm, gjithnjë në zbatim të ligjit antiduhan. Ka edhe lokale që i kemi gjobitur 4-5 herë dhe sërish vazhdon të pihet duhan”, sqaroi z. Pipero. Kontrollet do të vazhdojnë dhe Drejtoria e Shëndetit Publik paralajmëroi se do të ndëshkojë subjektet që nuk e respektojnë ligjin.Shekulli

keshtu e ka cigarja te gjobite dhe e gjobite,po se le dot