Lapidari i UÇPMB-së po mbahet në Beograd?

Deri tani nuk dihet zyrtarisht fati dhe destinacioni se ku ka përfunduar lapidari i UÇPMB-së, i hequr të dielën në mëngjes nga sheshi i Preshevës.

Autoritetet komunale në Preshevë kanë theksuar se lapidari po mbahet në Beograd, në një lokacion të Ministrisë së Drejtësisë të Serbisë, ku pritet verifikime dhe masa të tjera ligjore nga Serbia, gjoja për të vijuar procedurën penale kundër atyre që lejuan vendosjen e këtij monumenti, informon agjencia e lajmeve INA.

Edhe kryetari i komunës së Preshevës, Ragmi Mustafa nuk din destinacionin e saktë, por bazohet në informacionet e disa mediave, se vendndodhja e lapidarit të hequr është në Beograd.

Ndërkohë, jozyrtarisht disa media serbe kanë raportuar se lapidari është dërguar në Nish dhe se po mbahet në kushte sigurie, për mosdëmtimin e tij, deri në veprimin zyrtar të Qeverisë Serbe, për fatin e këtij monumenti historik për dëshmorët e UÇPMB-së.

Qeveria Serbe nuk ka dhënë hollësi për fatin e lapidarit dhe për masat e tjera se çfarë do të ndodhë me të.

Ambasadat amerikane dhe britanike në Beograd kanë shprehur keqardhje për vendimin e njëanshëm të Qeverisë së Serbisë për ta hequr monumentin e UÇPMB-së në Preshevë. Ndërkaq, kryeministri i Serbisë, Ivica Daçiq, ka thënë se “ka mbaruar rrëfimi për monumentin në Preshevë”. Sipas tij, ai nuk ka shkaktuar krizë, por se ajo është shkaktuar “nga shqiptarët në jug të Serbisë”.

"Unë nuk besoj se veteranët e al-Qaedas pyeten në Shtetet e Bashkuara apo ata që kanë bërë akte terroriste në Londër e Madrid, nëse duan të vendosin monument”, transmeton telegrafi raportimet e medieve serbe rreth deklarimeve të Daçiqit. “Fakti se Serbia dëshiron të negociojë, dikush këtë e sheh si dobësi tonën”.

"I keni dëgjuar deklaratat e tyre, se ata do të vazhdojnë të luftojnë me ndihmën e komunitetit ndërkombëtar. Cili komuniteti ndërkombëtar? Mbase unë e njoh bashkësinë ndërkombëtare dhe negocioj me ta", ka shtuar ai.

“Në Serbi do të respektohen ligjet. Thaçi mund të vë doganierët në pikëkalimet administrative e pastaj thonë se duhet të respektohen ligjet e Kosovës, e kur duhet të respektohen ligjet e Serbisë, hajt të bisedojmë. Nuk ka negociata me terroristët", tha Dacici dhe shtoi: “Me ata që lëvdojnë terrorizmin nuk mund të negociohet. Mund të negociohet me ata që duan të jenë pjesë e sistemit tonë politik dhe kushtetues. Nëse ne nuk kemi tregojnë tolerancë të mjaftueshme, atëherë unë nuk e di se kush”.